कोहलपुर १० अबस्थित वृत्ति विकास कृषि सहकारी संस्थाको १३औं वार्षिक साधारण सभा सम्पन्न।
स्थानीय
कोहलपुर १० अबस्थित वृत्ति विकास कृषि सहकारी संस्थाको १३औं वार्षिक साधारण सभा सम्पन्न।

कोहलपुर (बाँके) कोहलपुर १० स्थित श्री वृत्ति विकास कृषि सहकारी संस्था लिमिटेडको १३औं वार्षिक साधारण सभा विविध कार्यक्रमसहित भव्य रूपमा सम्पन्न भएको छ ।
उद्यमशिलता पारदर्शी र सहकारीको प्राथमिकता भन्ने मुल नारा सहित सदस्यहरूमा नियमित बचत गर्ने बानीको विकास गर्दै छरिएर रहेको सानो–सानो पुँजीलाई एकीकृत गरी सुलभ ब्याजदरमा कर्जा प्रवाह गर्नुका साथै आधुनिक कृषि उत्पादन, उद्यमशीलता प्रवर्द्धन र आत्मनिर्भर समाज निर्माण गर्ने मूल उद्देश्यका साथ संस्था क्रियाशील रहँदै आएको छ । सोही उद्देश्यअनुरूप संस्थाले वार्षिक प्रगति समीक्षा र आगामी कार्ययोजना निर्माणका लागि साधारण सभा आयोजना गरेको हो ।
संस्थाका अध्यक्ष रामबहादुर थारुको अध्यक्षतामा सम्पन्न साधारण सभाको उद्घाटन प्रमुख अतिथि जिल्ला सहकारी सङ्घकी प्रतिनिधि केश कुमारी भण्डारीले पानसमा बत्ती बालेर गर्नुभएको थियो । कार्यक्रमको उद्घाटन गर्दै उद्घाटन सत्रमा प्रमुख अतिथि भण्डारीले ग्रामीण तथा स्थानीय अर्थतन्त्रको मेरुदण्डका रूपमा रहेका सहकारी संस्थाहरूले सदस्यहरूको आर्थिक स्तर उकास्न महत्त्वपूर्ण भूमिका खेलेको बताउनुभयो । उहाँले सहकारीको मर्म र सिद्धान्तअनुसार बचत तथा ऋण कारोबारसँगै कृषि उत्पादन, प्रशोधन र बजारीकरणमा संस्थाले अझ प्रभावकारी ढंगले काम गर्नुपर्नेमा जोड दिनुभयो । स्थानीय स्रोतसाधनको अधिकतम परिचालन गरी आत्मनिर्भरता बढाउन सहकारी अभियानलाई थप सुदृढ बनाउनुपर्ने उहाँको भनाइ थियो ।
साधारण सभामा विशिष्ट अतिथिका रूपमा कोहलपुर नगरपालिका वडा नम्बर १० का अध्यक्ष गौराकुमारी भट्टराईको उपस्थिति रहेको थियो । उहाँले स्थानीय तह र सहकारी संस्थाबीचको सहकार्यले वडा तथा नगरको समग्र विकासमा टेवा पुग्ने विश्वास व्यक्त गर्नुभयो । कृषि र उद्यमशीलतासँग जोडिएका कार्यक्रममा स्थानीय सरकारले आवश्यक समन्वय र सहजीकरण गर्ने प्रतिबद्धता जनाउँदै उहाँले संस्थाको उत्तरोत्तर प्रगतिको कामना गर्नुभयो ।
कार्यक्रममा संस्थाका उपाध्यक्ष प्रेमनारायण पौडेल, निवर्तमान अध्यक्ष फडाकुमारी शर्मा र कानुनी सल्लाहकार कर्णबहादुर केसीको समेत विशेष उपस्थिति रहेको थियो । सो अवसरमा बोल्दै निवर्तमान अध्यक्ष शर्माले जम्मा १२ सय रुपैयाँबाट सुरु भएको यो संस्था आज ५ करोड रुपैयाँसम्मको कारोबार गर्न सफल भएको देख्दा आफूलाई अत्यन्तै खुसी र गर्व महसुस भएको बताउनुभयो ।
संस्थालाई यो उचाइसम्म ल्याउन सञ्चालक समिति, कर्मचारी र सम्पूर्ण सेयर सदस्यहरूको सामूहिक मेहनत र इमान्दारिताको मुख्य भूमिका रहेको उहाँको भनाइ थियो । यस्तै, अन्य वक्ताहरूले संस्थाको विगतको यात्रा, कानुनी अनुपालना, सुशासन तथा आगामी कार्यदिशाका विषयमा आ–आफ्ना धारणा राख्नुभएको थियो ।
साधारण सभामा पत्रकार, स्थानीय समाजसेवी तथा संस्थाका सम्पूर्ण सेयर सदस्यहरूको उल्लेखनीय सहभागिता रहेको थियो ।
बन्दसत्रमा संस्थाको वार्षिक प्रगति प्रतिवेदन, आर्थिक प्रतिवेदन तथा आगामी आर्थिक वर्षको नीति तथा कार्यक्रममाथि छलफल गरी पारित गरिएको थियो । सेयर सदस्यहरूले राखेका जिज्ञासा र सुझावलाई संस्थाले आगामी योजनामा समेट्ने प्रतिबद्धता जनाएको छ ।
कार्यक्रमका सञ्चालक शेरबहादुर योगीको आकर्षक र मीठो उद्घोषणमा सञ्चालन भएको उक्त सभाको व्यवस्थापकीय सहजीकरण संस्थाकी व्यवस्थापक शान्ति सिंहलगायत सञ्चालक समिति तथा सम्पूर्ण कर्मचारीहरूले गर्नुभएको थियो भने विभिन्न बिधामा शेर सदस्यहरु सम्मानित हुनुभएको थियो।
सभाको समापन सत्रमा बोल्दै सभाध्यक्ष रामबहादुर थारुले साधारण सभालाई सफलतापूर्वक सम्पन्न गर्न सहयोग पुर्याउने प्रमुख अतिथि, विशिष्ट अतिथि, सल्लाहकार, पत्रकार, व्यवस्थापक, कर्मचारी तथा सम्पूर्ण सेयर सदस्यहरूप्रति हार्दिक आभार व्यक्त गर्नुभयो । सदस्यहरूको निरन्तर साथ, विश्वास र सक्रिय सहभागिताकै कारण संस्थाले १३औं साधारण सभासम्म आइपुग्दा उल्लेखनीय प्रगति हासिल गर्न सकेको उहाँले बताउनुभयो । आगामी दिनमा कृषि क्षेत्रको आधुनिकीकरण, सदस्य सेवाको गुणस्तर वृद्धि र संस्थागत सुशासनलाई प्राथमिकतामा राखेर अघि बढ्ने प्रतिबद्धता जनाउँदै अध्यक्ष थारुले सभा विसर्जन गर्नुभएको थियो ।
थप समाचार


स्थानीय
राष्ट्रिय
Follow Us
View our latest news on any of these social networks!



