जाजरकोटको भेरी नगरपालिका वडा नम्बर १० मा स्थानीयकै बलमा सडक निर्माण सुरु !

 जाजरकोटको  भेरी नगरपालिका वडा नम्बर –१० का स्थानीयवासीहरूले आफैं जुटेर बर्षामा भत्किएको सडक पुनःनिर्माण गर्न सुरु गरेका छन्।

झण्डै दुई किलोमिटर लामो सडक वडाध्यक्ष दलबहादुर रानाको अगुवाइमा शनिबारदेखि निर्माण कार्य सुरु गरिएको हो।

पल्सेनी देखि  वडा कार्यालयसम्म पुग्ने उक्त सडक  वर्षाको समयमा भत्किँदा आवतजावत पूर्ण रूपमा अवरुद्ध भएको थियो। पटक–पटक नगरपालिकालाई जेसीबी मेसिन पठाउन आग्रह गरे पनि कुनै सहयोग नपाएपछि स्थानीयहरूले आफैं श्रमदानमार्फत बाटो बनाउन थालेका हुन्।

वडाध्यक्ष रानाले सडक पुनःनिर्माणलाई स्थानीय विकासको मेरुदण्ड भन्दै भने, “हामीले बारम्बार नगरपालिका समक्ष मेसिन माग्यौं, तर सहयोग पाउन सकेनौं। गाउँमा दैनिक हिँडडुलमै समस्या भएकाले स्थानीय नै जुटेर काम सुरु गरेका हौं।” सो अवसरमा वडा सचिव लालबहादुर कार्की पनि स्वयं उपस्थित रहे। उनले स्थानीयवासीको एकता र पहलको प्रशंसा गर्दै भने, “सडक केवल बाटो मात्र होइन, विकास र सुगमता जोड्ने जीवनरेखा हो। स्थानीयहरूले देखाएको प्रतिबद्धता प्रशंसनीय छ, अब नगरपालिकाले पनि आवश्यक सहयोग गर्नुपर्छ।”

सडक निर्माणमा सहभागी स्थानीयवासी चन्द्रबहादुर वली, गोपाल महतारा, धनबहादुर डी.सी.लगायतले वडाध्यक्षसँगै सप्पल , बेल्चा, गैंटी स्थानीय औजारहरु बोकेर बिहानदेखि बेलुकीसम्म घामपानी नभनी श्रमदान गर्दै आएका छन्। उनीहरूले बाटो बन्दै गएपछि गाउँलेहरूलाई राहत हुने विश्वास व्यक्त गरेका छन्।

स्थानीय श्रमिक धन बहादुर डि.सी.ले भने, “सडक भत्किँदा सामान बोकेर बजार धाउन ए गाउँघर र वडा कार्यालय सम्म जान आउन  निकै गाह्रो थियो अब  अहिले आफैंले बाटो बनाउन थालेपछि केही सहज हुने आशा पलाएको बताएका छन ।” यस्तै अर्का श्रमिक गोपाल महताराले भने, “सडक बिग्रँदा बिरामीलाई हिँडाउँदै बजार पुर्‍याउनुपर्ने बाध्यता हट्नेछ भन्ने विश्वास हामीलाई छ।” हाल सडकमा खाल्डाखुल्डी पुर्ने, बाटो फराकिलो पार्ने, माटो थुपार्ने काम भइरहेको छ। यसले विद्यालय जाने विद्यार्थीदेखि उपचारका लागि बजार पुग्ने बिरामी, किसानका उत्पादन बोक्ने व्यापारी सबैलाई सहज हुने अपेक्षा गरिएको छ।

वडाध्यक्ष रानाले भने, आगामी दिनमा पनि पालिकाबाट प्राविधिक सहयोग नआए स्थानीयकै श्रममा सडकलाई स्थायी बनाउन निरन्तरता दिने प्रतिबद्धता जनाएका छन्।

स्थानीयहरूले सडक बनाउन पसिना बगाइसकेका छन्। अब नगरपालिकाले समेत ध्यान दिएमा विकासलाई गति दिन सकिने उनीहरूको विश्वास छ।