न्यायको उज्यालो किरण : सर्वोच्चको आदेशपछि एकल बादी महिलालाई सामाजिक सुरक्षा भत्ता!

सर्वोच्च अदालतले एकल बादी महिलाको जीवनमा आशाको ज्योति जगाउने निर्णय सुनाएको छ ।

अदालतले सरकारलाई एकल बादी महिलाहरूलाई सामाजिक सुरक्षा भत्ता उपलब्ध गराउन परमादेश जारी गरेसँगै लामो समयदेखि बेवास्ता र उपेक्षामा परेका उनीहरू अब राज्यको संरक्षणमा आउने भएका छन् ।

कमिट नेपालका अनुसार, यो आदेशले देशभर करिब पाँच सयभन्दा बढी जोखिमपूर्ण अवस्थाका महिलाहरूलाई प्रत्यक्ष राहत दिनेछ । आफ्नो जीवन धान्न संघर्षरत महिलाहरूलाई मासिक भत्ताले आधारभूत आवश्यकता पूरा गर्न सहज बनाउने अपेक्षा गरिएको छ ।

यो न्यायको यात्रामा कमिट नेपालसँगै केशव बादी (नेपाली), बसन्ती नेपाली, पवित्रा नेपाली, शारदा नेपाली, पूजा नेपाली, बिनिता नेपाली, बिना नेपाली र एलएसीसी काठमाडौंले साहसिक कदम चालेका थिए ।

सार्वजनिक सरोकारको मुद्दा (PIL) मार्फत दायर गरिएको यो रिटमाथि अदालतले दिएको आदेशलाई समुदायले ऐतिहासिक जितका रूपमा स्वागत गरेका छन् । अदालतले दिएको यो फैसला केवल कागजी आदेश मात्र नभई बाँच्नको अधिकार सुरक्षित गर्ने जीवनदायिनी दस्तावेज हो भन्ने अनुभूति उनीहरूलाई भएको छ ।

अब सरकारले आवश्यक कानुन र नीतिनियम बनाएर कार्यान्वयनमा ढिलाइ नगर्नुपर्ने कमिट नेपाल र बादी समुदायको माग छ । बाँके, बर्दिया र दाङलाई मुख्य कार्यक्षेत्र बनाउँदै आएको कमिट नेपालले महिलाको अधिकार र सम्मानका लागि निरन्तर संघर्ष गर्दै आएको छ ।

संस्थाले सर्वोच्चको यो आदेशलाई “न्यायको ढोका खुल्ने ऐतिहासिक क्षण” को संज्ञा दिँदै महिलाको जीवनमा नयाँ आशा जगाएको बताएको छ ।