बाँकेको बैजनाथ ३ बैरहवामा तीज उत्सव : महिलाहरुको व्यापक सहभागिता!

बैजनाथ ३ बाँके - “मौलिक चाड संस्कृती हाम्रो सान, तीज पर्व संरक्षण हाम्रो अभियान” भन्ने मूल नाराका साथ बैजनाथ गाउँपालिका–३ बैरहवा बजारमा भव्य रूपमा आयोजित मौलिक तीज गीत तथा नृत्य प्रतियोगिता २०८२ सम्पन्न भएको छ।

प्रतियोगितामा विभिन्न समूह र संघसंस्थाले प्रस्तुत गरेका तीजका मौलिक गीत र नृत्यले वातावरण उत्सवमय र दर्शकहरूको घमाघम उपस्थितिले बजारको माहोल साँस्कृतिक पर्वमा परिणत भएको थियो।

 कृषि हाटबजार तथा मेला व्यवस्थापन समितिका अध्यक्ष यशब कुमार खप्तरीको अध्यक्षतामा  प्रमुख अतिथि बैजनाथ गाउँपालिकाका अध्यक्ष प्रकाशबहादुर शाहीले पानसमा बत्ती बालेर कार्यक्रमको  उद्घाटन गरेका थिए।

उद्घाटन सत्रमा बोल्दै प्रमुख अतिथि शाहीले  मौलिक संस्कृतिको संरक्षण आजको आवश्यकता भएको बताउउदै  तीज पर्व महिलाको मात्र चाड नभई सामाजिक एकता, प्रेम र मेलमिलापको सन्देश दिने पर्व भएकाले यसलाई मौलिक ढंगले जोगाउन सबैको भूमिका अपरिहार्य भएको धारणा राखे।

विशिष्ट अतिथि गाउँपालिकाकी उपाध्यक्ष निर्मला रोकायाले महिलाको आत्मबल अभिवृद्धि र प्रतिभा प्रोत्साहनका लागि यस्ता कार्यक्रमले ठूलो योगदान पुर्याउने बताइन।

विशिष्ट अतिथि वडा नं. ३ का अध्यक्ष निखिल  बैगार , विशिष्ट अतिथि बैजनाथ गाउँपालिकाका प्रमुख प्रशासकीय अधिकृत धर्मराज न्यौपाने ,  वडा नं. ४ का अध्यक्ष प्रेम बहादुर शाही, ने.क.पा. एमाले बैजनाथ गाउँ कमिटी उपाध्यक्ष  एकता शाह, लगायत  राजनीति  दलका प्रतिनिधि तथा नागरिक समाजका अगुवाहरुको  बाक्लो रूपमा सहभागी रहेको थियो।

आजको कार्यक्रममा आठ वटा समूह ले भाग लिएको थिए। नतिजा घोषणा प्रतियोगिताको परिणामअनुसार भौरीकुना कलाकेन्द्रले २३६ अंक ल्याएर   पहिलो भएको छ। सिर्जनशील आमा समुहले २०६ अंक ल्याएर दोस्रो भएको छ भने नेपाल राष्ट्रिय मा.बि नौबस्ताले २०५ अंक ल्याएर तेस्रो भएको छ।   निर्णायककर्ता नम्बर १ मा जीतबहादुर  थापा, निर्णायककर्ता नम्बर २- यमुना  रसाइली र प्रकाश  सोनी रहेका थिए।निर्णायकहरूले प्रस्तुतिहरू मौलिकपन, गायन, नृत्यकला, भेषभूषा र भावप्रवणतालाई आधार मानी मूल्याङ्कन गरेका थिए।

 समापन मन्तव्यमा अध्यक्ष यशब कुमार खप्तरीले कृषि बजारसँगै संस्कृति संरक्षणलाई समेत प्राथमिकतामा राख्ने प्रतिबद्धता जनाउदै स्थानीयस्तरमा आयोजना गरिएका यस्ता प्रतियोगिताले एकातर्फ महिलाको प्रतिभा उजागर गर्ने मात्र नभई अर्को तर्फ परम्परागत संस्कृतिलाई नयाँ पुस्तामा हस्तान्तरण गर्ने माध्यम बन्ने विश्वास व्यक्त गरे।

कार्यक्रमको कुशल सञ्चालन धनबहादुर थापाले गरेका  थिए भने सहजीकरण सचीन बैगारले गरेका थिए।यसरी, बैरहवा बजारमा सम्पन्न मौलिक तीज गीत तथा नृत्य प्रतियोगिताले स्थानीयवासीमा उल्लासपूर्ण वातावरण सिर्जना गर्नुका साथै संस्कृति जगेर्नातर्फ महत्वपूर्ण योगदान गरेको आयोजक समितिले जनाएको छ।