कोहलपुरको हल्दारपुरमा दुखद घटना : सिर्जना रसाइली झुण्डिएको अवस्थामा फेला!

 कोहलपुर — बाँकेको कोहलपुर–१४ हवल्दारपुर नजिकै रहेको राम माध्यमिक विद्यालय परिसरमा शुक्रबार बिहान एक महिलाको शव झुण्डिएको अवस्थामा फेला परेको छ।

सुर्खेत बिरेन्द्रनगर–१ निवासी ३५ वर्षीया सिर्जना रसाइली विद्यालय परिसरकै निमको रुखमा मृत फेला परेकी हुन्।

साउन २४ गतेदेखि कोहलपुर–१४ हवल्दारपुरको एक स्थानीय क्याफेमा काम गर्न थालेकी रसाइलीलाई दुई दिनअघि तीजको दिन बेहोस भएर अस्पताल पुर्याइएको थियो। अस्पतालमा चेकजाँच गर्दा उनी कहिले हाँस्ने, कहिले रुँदै गर्ने मनोवैज्ञानिक अवस्था देखिएको क्याफेका सञ्चालकले बताएका छन्। अस्पतालबाट बाहिर निस्किएपछि उनी फेरि क्याफेमा फर्केकी थिइन्। तर गत रात साढे २ बजे ढोका ढकढक्याउँदै कोही अपरिचितसँग सडकमा उभिएको देखिएको स्थानीयले बताएका छन्।

शुक्रबार बिहान विद्यालय परिसरको निमको रुखमा झुुन्डिएको अबस्थामा  रसाइली मृत फेला परेकी थिइन्। घटनास्थलमा उनका केही लत्ताकपडा पनि भेटिएको प्रहरीले जनाएको छ। प्रहरीले घटनाको प्रकृति आत्महत्या वा अन्य कारण भएको भन्नेबारे अनुसन्धान सुरु गरेको छ।

सिर्जना रसाइली विगतमा श्रीमानसँग डोबोस (विवाह विच्छेद) भएको बताइएको छ। व्यक्तिगत समस्यासँगै मानसिक तनावले यो घटनामा भूमिका खेल्न सक्ने अनुमान गरिएको छ। तर यसबारे प्रहरीले औपचारिक निष्कर्ष ननिकालेको स्पष्ट पारेको छ।

अचानक भएको यस घटनाले स्थानीयवासी भावुक बनेका छन्। काम खोज्दै कोहलपुर आएकी एक महिला यसरी असामयिक मृत्युको चपेटामा परेपछि पीडाले गाउँ र परिवार दुवैलाई स्तब्ध बनाएको छ। समाजका महिलाले तीजमा खुसी साटिरहेका बेला सिर्जना रसाइलीले जीवन गुमाउनु दुःखद विडम्बना बनेको छ।

प्रहरीले आवश्यक अनुसन्धान अघि बढाएको र घटनाबारे सम्पूर्ण विवरण सार्वजनिक गर्ने जनाएको छ।